Wieħed minn kull tmien applikanti għall-akkomodazzjoni soċjali ġej minn Raħal Ġdid jew San Pawl il-Baħar. Din l-informazzjoni ħarġet minn mistoqsija parlamentari reċenti mill-Membru Parlamentari tal-Oppożizzjoni Bernice Bonello lill-Ministru għall-Akkomodazzjoni Soċjali Roderick Galdes.

Jirriżulta li bħalissa hemm 1,640 applikant li qed ifittxu akkomodazzjoni soċjali, probabbilment għax m’għandhomx il-mezzi biex jikru jew jixtru proprjetà bir-rati kummerċjali.

L-ikbar numru ta’ applikanti joqogħdu Raħal Ġdid (109), segwiti minn San Pawl il-Baħar (92), Birkirkara (86), Iż-Żejtun (73) u Ħaż-Żabbar (68). Min-naħa l-oħra, l-inqas numru ta’ applikanti huma minn Għawdex, fejn hemm 33, li nofshom jinsabu r-Rabat u ż-Żebbuġ.

Jekk wieħed iħares lejn il-mistoqsija parlamentari oħra li saret f’Frar li għadda, jidher li sar ftit li xejn sar progress biex titnaqqas il-lista ta’ stennija peress li l-ammont totali dak iż-żmien kien ta’ 1,553.

Il-kwistjoni tal-akkomodazzjoni soċjali għamlet ‘ritorn’ fl-aħħar snin wara ż-żieda rapida tal-popolazzjoni li rriżultat f’żieda fil-prezzijiet tal-kirjiet kif ukoll fil-valur tal-proprjetà. Filwaqt li d-daqs medju tal-proprjetà naqas, il-prezzijiet komplew jogħlew xorta waħda. Barra minn hekk, parti kbira tal-proprjetajiet vojta qed jiġu mikrija lil ċittadini minn pajjiżi terzi, li qed jingħaqdu flimkien biex ikunu jistgħu jaffordjaw il-kera ta’ kull xahar. Dan, min-naħa tiegħu, qed iżid id-diffikultà għal Maltin li jixtiequ jikru proprjetà.

Aktar kmieni din is-sena, proġett ta’ akkomodazzjoni soċjali spiċċa fl-aħbarijiet wara  allegazzjonijiet ta’ frodi elettorali qabel l-elezzjonijiet tal-Parlament Ewropew u tal-kunsilli lokali.

Il-qorti sabet li 99 persuna bidlu l-indirizz tagħhom għall-proġett ta’ akkomodazzjoni li kien għadu mhux lest mingħajr ma fil-fatt kienu jgħixu hemm. Din is-sitwazzjoni qajmet tħassib dwar “votanti fantażma” li ġew irreġistrati f’dawn il-postijiet, possibbilment bħala parti minn sforz biex jinfluwenzaw l-elezzjonijiet lokali. Fis-sentenza tagħha l-Qorti ordnat lill-Kummissjoni Elettorali biex tneħħi dawn ir-reġistrazzjonijiet, għax il-persuni involuti kienu ġew manipulati biex ibiddlu l-indirizzi tagħhom.