Id-dibattitu tal-Eurovision bejn il-kandidati ewlenin għall-presidenza tal-Kummissjoni ser isir il-Ħamis 23 ta’ Mejju mit-15.00 sal-16.45 fil-kamra plenarja tal-Parlament fi Brussell.

Id-dibattitu huwa organizzat mill-Unjoni Ewropea tax-Xandir (EBU) b’kollaborazzjoni mal-partiti politiċi Ewropej u l-Parlament Ewropew.

L-EBU ħabbret il-kandidati ewlenin għall-presidenza tal-Kummissjoni li kkonfermaw il-preżenza tagħhom fid-dibattitu fit-23 ta’ Mejju:

Walter Baier (Awstrija), ix-Xellug Ewropew

Sandro Gozi (Italja), Renew Europe Now

Ursula von der Leyen (Ġermanja), il-Partit Popolari Ewropew (PPE)

Terry Reintke (Ġermanja), il-Ħodor Ewropej

Nicolas Schmit (Lussemburgu), il-Partit tas-Soċjalisti Ewropej (PSE)

Il-kandidati se jitkellmu bl-Ingliż, u l-interpretazzjoni se tiġi pprovduta f’24 lingwa.

Id-dibattitu ser jiġi mmoderat minn Martin Andezníček (TV Ċek) u Annelies Beck (VRT, Belġju).

Il-ħames kandidati se jiddibattu dwar diversi suġġetti ewlenin. Il-mistoqsijiet se jsiru mill-udjenza fil-kamra plenarja, mit-telespettaturi li jkunu qed isegwu avvenimenti organizzati mill-Uffiċċji ta’ Kollegament tal-Parlament fl-Istati Membri tal-UE, u miż-żewġ moderaturi. Il-kandidati se jiffaċċjaw ukoll mistoqsijiet individwali mill-moderaturi fl-hekk imsejħa segmenti “Spotlight”, karatteristika ġdida fid-Dibattitu tal-Eurovision 2024.

Avvenimenti speċjali biex jiġi segwit id-dibattitu dirett ser jiġu organizzati madwar l-UE mill-midja tas-servizz pubbliku f’kooperazzjoni mal-Uffiċċji ta’ Kollegament tal-Parlament Ewropew fl-Istati Membri.

Fis-16 ta’ Mejju, il-midja huma mistiedna wkoll jattendu polza organizzata mill-EBU fil-Parlament Ewropew fi Brussell (studjo tat-TV Agora, ħdejn il-VoxBox fit-tielet sular tal-bini Spinelli, fl-16.00). Il-polza se tiddetermina l-pożizzjoni tal-kandidati fuq il-palk tad-dibattitu, l-ewwel kelliem dwar kull suġġett, u l-ordni tal-intervisti ‘spotlight’.

Kif tista’ ssegwi d-dibattitu

Il-programm se jixxandar fuq l-EBS u l–EBU bit-tikketti tal-ismijiet tal-parteċipanti fuq l-iskrin u elementi grafiċi essenzjali oħra. Verżjoni ‘nadifa’ tad-dibattitu se tkun disponibbli fuq l-EbS+ iżda biss għal edits tal-aħbarijiet, mhux għal xandira diretta sħiħa. Se jixxandar ukoll fuq is-sit web tal-Parlament (Multimedia Centre) u se jkun aċċessibbli fuq il-pjattaformi ta’ distribuzzjoni tal-EBU. Mhu se jkun permess l-ebda iffilmjar indipendenti tad-dibattitu minn ġewwa l-kamra.

Iċ-Ċentru Multimedia tal-Parlament se jipprovdi wkoll feed bil-Lingwa Internazzjonali tas-Sinjali u l-Vlotip (traskrizzjoni diretta bl-Ingliż), kif ukoll verżjonijiet sottotitolati fil-lingwi uffiċjali tal-UE jekk dawn jintalbu, ladarba jintemm id-dibattitu. Dawn il-fajls ikunu pprovduti qabel is-19:00 CET. Jekk inti interessat f’dan il-format jekk jogħġbok ikteb lil AVNewsDesk@europarl.europa.eu.