L-edizzjoni ta’ din il-ġimgħa hi l-aħħar waħda tiegħi bħala editur tal-Voice of the Workers Weekly. Matul il-ħames snin li għaddew, dan il-portal stabbilixxa ruħu bħala pjattaforma konsistenti u ta’ ċertu kredibbiltà, li qatt ma falla l-appuntament ta’ kull ġimgħa ħlief pawża waħda fi żmien il-festi fi tmiem is-sena. Kien ta’ unur għalija li nkun f’din il-kariga li nieħu ħsieb pubblikazzjoni elettronika li trattat, analizzat u tefgħet d-dawl fuq kwistjonijiet ta’ importanza kemm għall-ħaddiema kif ukoll għas-soċjetà b’mod ġenerali.

Matul dan iż-żmien, Voice of the Workers Weekly irrappurtat stejjer ta’ importanza nazzjonali. Forsi l-aktar waħda li ħalliet impatt kienet dwar il-każ fil-Foundation for Social Welfare Services, fejn aktar minn 400 impjegat skoprew li kellhom il-bolol mhux imħallsa, b’valur komplessiv ta’  €10 miljun. Din il-kwistjoni serja fl-aħħar mill-aħħar ġiet indirizzata, iżda kien biss wara li kienet ġiet żvelata minn dan il-portal u mbagħad rappurtata wkoll bi prominenza mill-media nazzjonali. Kienet xhieda ċara tal-impatt li jista’ jġib miegħu rappurtaġġ persistenti u bbażat fuq il-fatti.

Il-portal serva wkoll bħala pjattaforma ta’ għarfien u riċerka. B’mod konsistenti ippubblika studji interni mwettqa mill-UHM Voice of the Workers fosthom analiżi tal-prezzijiet tal-ikel u l-inflazzjoni fit-tul fis-settur tal-propjetà. Fl-istess ħin, il-qarrejja kienu infurmati dwar żviluppi madwar l-Ewropa, billi sar użu mix-xogħol ta’ Eurofound f’oqsma bħall-bilanċ bejn ix-xogħol u l-ħajja privata, remote working u l-kundizzjonijiet tal-impjieg. Kwistjonijiet soċjali usa’, bħaż-żieda fil-prezz tal-kura tas-saħħa għaċ-ċittadini li suppost igawdu minn kura b’xejn mill-Istat, ukoll ġew enfasizzati sabiex tingħata stampa aktar kompleta tal-isfidi li qed taffaċċja s-soċjetà Maltija.

Rwol ieħor importanti ta’ dan il-portal kien li jwassal l-attivitajiet organizzati tul is-sena. Dawn kienu jvarjaw minn inizjattivi soċjali, għal laqgħat speċjalizzati bħas-seminar annwali tal-EZA f’Novembru. B’dan il-mod, il-portal ma kienx biss sors ta’ aħbarijiet iżda wkoll mezz ta’ djalogu u għarfien.

Ta’ min ifakkar li Voice of the Workers Weekly beda l-vjaġġ tiegħu fl-2015 bħala parti minn proġett iffinanzjat mill-UE. Madankollu, is-saħħa tiegħu tinsab fil-kapaċità li jibqa’ rilevanti u kredibbli lil hinn minn dak il-qafas inizjali. Illum, il-legat tiegħu hu wieħed sod u se jkompli jevolvi taħt tmexxija ġdida.

Fl-aħħarnett nibgħat l-isbaħ xewqat lis-suċċessur tiegħi. Il-futur ta’ dan il-portal jiddependi mill-impenn kontinwu li jipprovdi leħen dwar il-kwistjonijiet li l-aktar jinteressaw lill-ħaddiema imma hux biss.

Minkejja li l-prezzijiet tal-propjetà qegħdin jogħlew mhux ħażin, skont l-aħħar ċifri ppubblikati mill-Uffiċċju Nazzjonali tal-Istatistika, ma hemm l-ebda sinjali ta’ tnaqqis fil-bejgħ, hekk kif in-numru ta’ konvenji kif ukoll kuntratti finali għadu qiegħed jiżdied. Madankollu, l-istatistika ma tispeċifikax kemm minn dawn it-tranżazzjonijiet jinvolvu first-time buyers. Għaldaqstant, l-istatistika tista’ tkun qed taħbi problema ta’ affordabbiltà għall-propjetà fost iż-żgħażagħ.

Jirriżulta li f’Lulju 2025, in-numru ta’ kuntratti finali tal-bejgħ laħaq 1,266, żieda ta’ 21.8% meta mqabbel ma’ Lulju 2024. Il-valur ta’ dawn il-kuntratti laħaq €383.1 miljun, li jirrappreżenta żieda ta’ 35.1% meta mqabbel mal-valur tal-kuntratti f’Lulju 2024.

F’Lulju 2025, ġew irreġistrati 1,229 konvenju relatati ma’ propjetà residenzjali, ekwivalenti għal żieda ta’ 15.6% fuq l-istess perjodu fl-2024. Xerrejja individwali potenzjali (familji) kienu jammontaw għal 1,099 (jew 89%), filwaqt li l-bqija kienu jinvolvu prinċipalment kumpaniji.

Osservazzjoni interessanti hija li f’Lulju n-numru ta’ kuntratti qabżu l-konvenji – xejra li kienet irreġistrata biss fi tliet okkażjonijiet fl-aħħar sentejn.

Skont l-NSO, l-ogħla numri ta’ kuntratti ġew irreġistrati fuq propjetajiet ’San Pawl il-Baħar (90), Birkirkara (73) u l-Mosta (67). Il-valur tal-propjetajiet f’dawn il-lokalitajiet – li huma fost l-akbar fil-Gżejjer Maltin – kien ta’ għal 18.2 % tat-total.

Dawn iċ-ċifri ġew bejn wieħed u ieħor riflessi wkoll fil-konvenji, b’San Pawl il-Baħar (121), Birkirkara (69) u Tas-Sliema (59) fuq nett – li kienu jammontaw għal 20.3 % tat-total.

Min-naħa l-oħra r-Reġjun tal-Punent li jinkludi l-Imdina, Ħaż-Żebbuġ, Is-Siġġiewi, Ħ’Attard, Ħal Balzan, Ħad-Dingli, l-Iklin, Ħal Lija, ir-Rabat u l-Imtarfa kellu l-inqas numru kuntratti u konvenji. It-tieni l-inqas f’kull kategorija kien Għawdex.

Analiżi li l-UHM Voice of the Workers għamlet aktar kmieni din is-sena fuq kampjun ta’ prezzijiet ta’ propjetà reklamati fit-Times of Malta uriet li l-prezz medju ta’ appartament tela’ minn €142,000 fl-2015 għal €326,000 fl-2025. Din ix-xejra ġiet riflessa wkoll f’rapport komprensiv ippubblikat mill-kumpanija ta’ awditjar Grant Thornton flimkien ma’ Dhalia Real Estate Services, li kkonkludew li  f’għaxar snin il-prezz medju ta’l-propjetà f’Malta aktar minn rdoppja minn €150,000 għal €333,000, filwaqt li l-prezzijiet tal-kera telgħu b’71%.